31 mamyr saıası-qýǵyn súrgin jáne asharshylyq qurbandaryn eske alý kúnine oraı, Shaısultan Shaıahmetov atyndaǵy «Til-Qazyna» ulttyq ǵylymı-praktıkalyq ortalyǵynyń Bas dırektory, belgili alashtanýshy ǵalym Erbol Tileshov ujym múshelerin Elordamyzdyń irgesindegi «ALJIR» memorıaldyq-murajaı keshenine bastap apardy. Stalındik zulym saıasattyń saldarynan tirileı tozaqqa túsip, jazyqsyz jaladan adam tózgisiz azap shekkenderdiń rýhyna bas ıip, duǵa etti. Shynynda, murajaı eksponattary tamuq azabynan bir mysqal kem túspeıtin sol bir náýbetti kóz aldyńa ákelgendeı edi.
«Adam balasy kúnde synalmaıdy. Sondyqtan, janyńda júrse, júrekjutqan batyrlyǵyn baıqaı bermeýiń de múmkin. Al, el basyna kún týǵanda ultynyń qamy men urpaǵynyń bolashaǵy úshin tótelep kelgen ajaldan qaımyqpaı, sózin aıta bilgen, adal mahabbatyn saqtap, is-áreketin qorǵaı bilgenniń bári Batyr»,– dedi Erbol Erdembekuly.
Sapar aıaqtalyp jurtshylyq syrtqa shyqqanda, qara daýyl zulmattyń salqynyna urynyp, kúzgi qyr sekildi solǵandardyń kóz jasyndaı jańa ǵana tógip-tógip ótken jaýynnan keıin uıtqı soqqan doly jelden alańdaǵy bıik kók baıraǵymyz erekshe kósile jelpinip tur edi.
«Qaraly kúnder, qansyraǵan jaraly jyldar, eńseni janshyǵan qaıǵyly sátter qaıtalanbasynshy!» – desti aıryqsha tolqynys ústinde turǵan bári.