QR Bilim jáne ǵylym mınıstrligi Til saıasaty komıtetiniń tapsyrysymen Shaısultan Shaıahmetov atyndaǵy «Til-Qazyna» ulttyq ǵylymı-praktıkalyq ortalyǵy aǵymdaǵy jylǵy 18-27 tamyz aralyǵynda qazaq tili men ádebıetin oqytý boıynsha shetelderdegi qazaq tili muǵalimderi men oqytýshylaryna arnalǵan biliktilik arttyrý kýrstaryn ótkizedi.
Biliktilik arttyrý kýrstary Qazaqstan Respýblıkasynda til saıasatyn iske asyrýdyń memlekettik baǵdarlamasynyń «Abaı ınstıtýty» ashyq bilim berý jobasy aıasynda ótkiziledi.
Abaı ınstıtýty – bul óz elimizdegi azamattar úshin de, shetelderdegi qazaq dıasporasy men sol elderde týyp ósken qazaq balalary jáne qazaq tiline qyzyǵýshylyq tanytyp, úırengisi keletin sheteldik azamattarǵa da qazaq tilin úırenýge múmkindik beretin qazaq tilin, ádebıeti men mádenıetin dáripteıtin, qazaq tilin oqytý baǵdarlamalarynyń jalpyǵa qoljetimdiligin qamtamasyz etetin memlekettik baǵdarlamanyń mindetterin iske asyrý jobasy.
Abaı ınstıtýty aıasynda Túrkıa, Iran, AQSh, Belgıa, Fransıa, Germanıa, Reseı, Mońǵolıa, Ózbekstan elderinde qazaq tilin oqytý kabınetterin ashyp, oflaın jáne onlaın oqytý júrgizilýde. Byltyr bastalǵan qazaq tili sabaqtaryna qatysýshylar sany artyp keledi. Sonymen qatar Reseı, Mońǵolıa, Ózbekstan memleketterinde orta mektepterdiń qazaq tili men ádebıeti muǵalimderine ádistemelik kómek qajetteligi baıqalyp otyr.
Aýqymdy jumysty atqarýda shetelderdegi qandastarmen jumys júrgizýshi mekeme «Otandastar qorynyń» róli erekshe. Jyl basynan berin atalǵan memleketterdegi qazaq tili kabınetteri jumystaryn úzdiksiz qyzmet atqarýyna atalǵan mekeme úles qosyp keledi.
Byltyr «Abaı ınstıtýty» jobasyna arnaıy www.abai.institute portaly ázirlenip, iske qosylǵan bolatyn. Álemdik tájirıbelerge sáıkes portaldyń negizgi qaǵıdasy – ınternet paıdalanýshyǵa kez-kelgen yńǵaıly ýaqytta, kez-kelgen ózin qyzyqtyratyn taqyryp boıynsha óz betinshe til úırenýde onyń árbir qımylyna, berilgen saýalǵa jaýap berýine qaraı oǵan til úırenýdegi óte tıimdi baǵyt boıynsha «alyp júrip», aqyldy tehnologıa men ádisteme arqyly múmkindiginshe qysqa merzimde ózin sol úırenip otyrǵan tili boıynsha sóıleskende ózin óte jaıly sezinetindeı til úıretý.
«Qazaq tilin úıretý: halyqaralyq jáne qazaqstandyq tájirıbe» taqyrybyndaǵy shetelderdegi qazaq tili muǵalimderi men oqytýshylaryna arnalǵan biliktilik arttyrý kýrstaryna qazirgi tańda 125-ten asa adam tirkelip otyr. Qatysýshylyrdy qazaq tili men ádebıetin oqytýdaǵy qyzyqtyratyn taqyryptaryn dálirek anyqtaý maqsatynda aldyn ala saýalnama júrgizilip, kýrstardyń baıandamashylar quramy anyqtaldy. Elimizdegi qazaq tilin shetel tili jáne ekinshi til retinde oqytatyn bedeldi fılolog ǵalymdardan baıandamashylar toby jasaqtaldy. Olardyń ishinde Nazarbaev Ýnıversıtet, halyqaralyq mektepter men shetelderde qazaq tilin oqytyp júrgen ǵalymdar bar.
Biliktilik arttyrý kýrstary 8 kún boıy jalǵasady. 18-27 tamyzǵa josparlanǵan kýrstar onlaın formatynda ótetin bolady. Biliktilik kýrstary boıynsha tapsyrmalar oryndalyp, biliktilik arttyrý sertıfıkattary beriletin bolady.
Kýrstyń bul kezeńinde Reseıden, Mońǵolıadan, Ózbekstannan qazaq tili mamandary qatysady.