Qazaqstan Respýblıkasy Mádenıet jáne sport mınıstrligi Til saıasaty komıteti 2020 jylǵy 24 qyrkúıek kúni «Resmı qujattarda bekitilgen termınderdiń qoldanylý máselesi» taqyrybynda til janashylarymen onlaın rejimde kezdesý uıymdastyrdy.
Til saıasaty komıtetiniń tóraǵasy Ádilbek Qaba kúrmeýi qıyn termın máselesi tóńireginde ter tógip kele jatqan kezdesýge qatysýshylardyń jumysyna sáttilik tileı otyryp, máseleniń mańyzyna erekshe toqtaldy.
«Biz qoldanysqa engen termınderdi ár sala boıynsha zerdelep kele jatyrmyz. Búgin memlekettik tildi damytýdaǵy ózekti jáne mańyzdy máseleniń biri – resmı-iskerlik jazbasha qarym-qatynas týraly máseleni qarastyratyn bolamyz. Muny nazardan tys qaldyrýǵa bolmaıdy. Óıtkeni, halyqaralyq qatynastar, bılik pen halyqtyń arasyndaǵy, kásiporyn men uıymdar, mekemeler arasynda, jeke tulǵa men qoǵam arasyndaǵy baılanys resmı qujattar arqyly júzege asady. Al, olardyń kópshilikke túsinikti tilde keń qoldanysqa ıe bolýy qazirgi tańda óz deńgeıinde emes», – dedi ol.
Kezdesý barysynda Qazaqstan Respýblıkasy Úkimeti janyndaǵy Respýblıkalyq termınologıalyq komısıasy otyrystarynda maquldanǵan termınder jaıy, memlekettik tildegi resmı qujat tiliniń sapasy, resmı qujattarda bekitilgen termın qoldanysynyń qazirgi jaǵdaıy,praktık mamandardyń usynystary jan-jaqty talqylandy.
Ábden pisip-jetilgen máseleler týraly sóıleýshiler naqty dáıekpen aıtyp baqty. Kúndelikti ómirde jıi kezdesetin keleńsiz jáıtter synǵa alyndy.
Ádilbek Kúneshanuly budan burynǵy kezdesýlerde málimdegendeı, ár talqylaýdyń nátıjesi kezdesýge kelgen mınıstrlik ókilderi arqyly joǵary bılikkejetkiziletin bolyp sheshildi.
Onlaın-kezdesýge QR Prezıdenti janyndaǵy Memlekettik basqarý akademıasy Memlekettik tildi oqytý kabınetiniń meńgerýshisi, pedagogıka ǵylymdarynyń kandıdaty Nazıgúl Tólenbergenova, Zańnama jáne quqyqtyq aqparat ınstıtýty Lıngvıstıkalyq ortalyq basshysy Nurzada Prımashev, «Samuryq-Energo» AQ Memlekettik tildi damytý bóliminiń bastyǵy, fılologıa ǵylymdarynyń kandıdaty Asyljan Tórenıazova, QR Ulttyq ekonomıka mınıstrligi İshki ákimshilendirý departamenti Memlekettik til basqarmasynyń basshysy Gúlnar Qısyqova, «Ulttyq aqparattyq tehnologıalar» AQ Qujattamalyq qamtamasyz etý jáne lıngvıstıkalyq qoldaý basqarmasynyń bas menejeri Alma Shoqaeva qatysty.
İs-sharaǵa sala mamandary, fılologtar men joǵary oqý ornynyń stýdentteri, til janashyrlary ZOOM platformasy arqyly qatysyp otyrdy. Qatysýshylar onlaın rejimde Til saıasaty komıtetiniń tóraǵasyna, kezdesýde pikir bildirýshilergesuraqtaryn qoıyp, kóterilgen taqyryp boıynsha óz oılaryn ortaǵa saldy.