Búgin Nur-Sultan qalasynda Qazaqstan Respýblıkasy Mádenıet jáne sport mınıstrligi Til saıasaty komıteti Sh.Shaıahmetov atyndaǵy «Til-Qazyna» ulttyq ǵylymı-praktıkalyq ortalyǵymen birlesip «Jahandaný jáne ulttaný úderisindegi qazaq tiliniń ómirsheńdigi» atty respýblıkalyq til forýmyn ótkizdi.
Tuńǵysh forým Nur-Sultan, Almaty, Shymkent qalalary men 14 oblystyń, "Til-Qazyna" ortalyǵynyń arnaıy ázirlegen kórmesin tamashalaýdan bastaldy. Kórmede memldekettik tildi oqytýǵa jáne jańa latyn grafıkasyna negizdelgen qazaq álipbıin úırenýge arnalǵan ınovasıalyq jobalar tanystyryldy.
Til forýmynyń jalpy otyrystynda Elbasynyń «Bolashaqqa baǵdar: rýhanı jańǵyrý» baǵdarlamalyq maqalasynda jáne Qazaqstan Respýblıkasynyń Prezıdenti Q.K.Toqaevtyń «Syndarly qoǵamdyq dıalog – Qazaqstannyń turaqtylyǵy men órkendeýiniń negizi» Joldaýynda kórsetilgen memlekettik til saıastyn júzege asyrýdyń ózekti máseleleri talqylandy.
Formda Mádenıet jáne sport mınıstri Aqtoty Raıymqulova qazaq tili álipbıin latyn grafıkasyna 2025 jylǵa deıin kezeń-kezeńmen kóshirý jónindegi is-sharalar josparynyń aıasynda tıisti jumystar atqarylyp jatqandyǵyna toqtaldy.
- Tilimizdiń qoǵamdaǵy qyzmetin arttyryp, onyń áleýetin kóterý isi bizdiń jiti nazarymyzda. Álipbı reformasynyń jalpyhalyqtyq sıpat alý tektikterin iske qosý – búgingi kúnniń ózekti máselesi. Onyń joldaryn anyqtaý, Qazaqstandaǵy jáne álemdik tildik qaýymdastyqtaǵy qazaq tiliniń róli men mártebesi týraly zamanaýı bilim, aqparat, nasıhat alańdarynyń jumysyn uıymdastyrý - búgingi forýmnyń mindeti, - dedi.
Alqaly jıynda Q.Jubanov atyndaǵy Aqtóbe memlekettik ýnıversıtetiniń profesory, saıasattaný ǵylymdarynyń doktory Amangeldi Aıtaly "Til saıasatynyń áleýmettik máseleleri" taqyrybynda baıandama jasady. "Ulttyq jańǵyrýdyń negizi – tildik jańǵyrý" taqyrybynda Qazaqstan Respýblıkasy Parlamenti Senatynyń depýtaty Murat Bahtıaruly sóz sóılep, kópshilikke oı saldy.
Sonymen qatar qazaq tiliniń qazirgi ahýaly men jańa álipbıge kóshýdiń artyqshylyqtary týrasynda Aqmola oblystyq ardagerler keńesiniń tóraǵasy Ǵosman Tóleǵul, Qyzylorda oblysy ishki saıasat basqarmasynyń basshysy Talǵat Mahanov, «Amal books» baspasynyń jetekshisi Baqytjan Buqarbaı, Sh.Shaıahmetov atyndaǵy «Til-Qazyna» ulttyq ǵylymı-praktıkalyq ortalyǵynyń atqarýshy dırektory Erbol Tileshov baıandama jasap, jańa bastamaǵa jurtshylyqty jumyla jumys jasaýǵa shaqyrdy.
Forým sońynda tuńǵysh forýmnyń qarary oqyldy. Qararda árbir quzyrly organǵa usynystar aıtylyp, qazaq tiliniń mártebesin arttrý jolynda áriptestik ornatý qajettigi aıtyldy.
Túsken keıin forým jumysy seksıa otyrystarymen jalǵasty. «Ǵylym, bilim jáne til», «Bıznes jáne til», «Zań jáne til», «BAQ jáne til», «Memlekettik til bolashaǵy – jastar bolashaǵy», «Óńirlerdegi tildik ahýaldy taldaý» taqyryptarynda pikir alańdarynda taqyryptar keńinen ashlyp, naqty máseleleri ortaǵa salynyp, sheshý joldary oılastyryldy. Árbir seksıa otyrysynyń jeke qarary qabyldandy.