Jýyq jyldardan beri shetelde qazaq mádenıeti ortalyqtary ashylyp, sol arqyly elimizdiń mádenıeti men ádebıetin, tilin, salt-dástúrin ózge elderge nasıhattaý, tanystyrý jumystary júrgizilip keledi. Solardyń biri – ótken aptada ǵana Qazan federaldyq ýnıversıtetiniń fılologıa jáne mádenıetaralyq komýnıkasıa ınstıtýty bazasynda ashylǵan Abaı atyndaǵy «Qazaq tili men mádenıeti» ǵylymı ortalyǵy.
Abaı ortalyǵynyń ashylýy L.N.Gýmılev atyndaǵy Eýrazıa ulttyq ýnıversıtetiniń qoldaýymen júzege asyrylǵan. Onda klasıkalyq jáne qazirgi qazaqstandyq avtorlardyń ártúrli kórkem, tarıhı jáne ǵylymı-tanymal ádebıetteri jınaqtalǵan.
«Abaı ortalyǵy qazaq tilin oqytý jáne nasıhattaý, mádenı baılanystardy nyǵaıtý, halyqtyń baı jáne tól mádenıetimen, tarıhy men salt-dástúrimen, zamanaýı jetistikterimen jáne damý josparlarymen tanysý úshin qurylǵan», dep habarlady QR Syrtqy ister mınıstrligi.
Budan bólek uly Abaıdyń tulǵasy men murasyn ulyqtaý, ult mádenıetin nasıhattaý maqsatynda AQSh, Qytaı, Reseı, Fransıa,Ulybrıtanıa, Polsha, jáne ózge de memleketterdegi Qazaqstannyń elshilikteri janynan "Abaı ortalyqtary" ashylǵan. 2020 jyldan beri QR Sıngapýrdaǵy, Bolgarıadaǵy, Mysyrdaǵy, Pákistandaǵy, Majarstandaǵy, Irandaǵy jáne Efıopıadaǵy Elshilikteri janynda Abaı ortalyǵy jumys isteıdi.
Abaı ortalyqtary:
- AQSH-tyń Dj.Vashıngton ýnıversıtetimen birlesken Qazaqstannyń tarıhy men mádenıetin keńinen nasıhattaýǵa baǵyttalǵan «Abaı vırtýaldy ortalyǵy»;
- QR Belgıadaǵy Elshiligi janyndaǵy qazaq mádenıeti ortalyǵy;
- Chehıanyń «Klementıným» Ulttyq kitaphanasy janyndaǵy «Abaı» mádenı-aqparat ortalyǵy;
- Malaızıa Ulttyq kitaphanasynyń janyndaǵy «Abaı atyndaǵy qazaq ádebıeti jáne mádenıeti ortalyǵy»;
- Mońǵolıadaǵy Qazaqstan Respýblıkasynyń Elshiligi janyndaǵy Abaı buryshy;
- Lıtvanyń Vılnús okrýginiń Adam Mıskevıch atyndaǵy Qoǵamdyq kitaphanasynyń ǵımaratyndaǵy Abaı atyndaǵy oqý zaly.
