«Til-Qazyna» ulttyq ǵylymı-praktıkalyq ortalyǵynyń uıymdastyrýmen til mamandarynyń kásibı quzirettiligin arttyrýǵa baǵyttalǵan onlaın-semınar óz jumysyn bastady.
«Oqytýshylardyń kásibı daǵdylaryn damytýǵa jáne jasandy ıntellektini ıntegrasıalaýǵa baǵyttalǵan qazaq tilin oqytýdyń zamanaýı ádis-tásilderi» respýblıkalyq onlaın-semınary 13 mamyr kúni óz jumysyn bastady. Jospar boıynsha ol 22 mamyrǵa deıin jalǵasady.
İs-sharany «Til-Qazyna» UǴPO basshysy Maqpal Jumabaı alǵysózimen ashyp, bylaı dep pikirin bildirdi: «Dál qazir ǵylym men tehnologıalar óz damý tarıhynda birinshi ret tilge táýeldi bolyp otyr. Búkil tehnologıalardyń damýy tilge ǵana qatysty bolyp qaldy. Mundaı qubylys tehnologıalardyń damýyndaǵy sońǵy júz jylda bolǵan emes. Endi álem jantalasyp jasandy ıntellektke óz tilderin úırete bastady. Qaı memlekettiń tili jasandy ıntellektte erkin qoldanysta sol el táýelsiz, óz aldyna damýyǵa múmkindik alady. Al ol úshin biz tilimizdi sıfrlandyrýymyz kerek. Qazir biz osy baǵytta jumys istep jatyrmyz. Sol arqyly aldaǵy ýaqytta memlekettik tildi oqytý da jeńildep, qoldanysy da keńeıedi degen senimdemin. Búgingi semınar barshańyz úshin paıdaly tájirıbe almasý alańy bolady degen úmittemin».
Onlaın basqosýdyń alǵashqy kúni memlekettik tildi oqytýda jasandy ıntellektini tıimdi paıdalaný taqyrybyna arnaldy. Ál-Farabı atyndaǵy Qazaq ulttyq ýnıversıtetiniń dosenti, f.ǵ.k. Baqyt Aıtpaeva óz tájirıbesimen bólisti. Ádisker jasandy ıntellektiniń til úıretýdegi erekshelikterine toqtalyp, tildi qashyqtan oqytýda qoldanylatyn yńǵaıly platformalardy tanystyryp, jumys jasaý jolyn kórsetti. Onlaın-semınarǵa qatysqan júzge jýyq oqytýshy, ádiskerler LUMIO, Flippity portaldarynda spıker nusqaýymen jumys jasap, úı tapsyrmasyn aldy.
Til mamandarynyń kásibı biliktiligin kóterip, ýaqyt talabyna saı qazaq tilin oqytýdyń jańa ádis-tásilderin úıretip, zamanaýı İT tehnologıa múmkindikterin tıimdi paıdalaný joldaryn nusqaıtyn, «Til-Qazynanyń» Ádisteme bólimi uıymdastyryp jatqan onlaın-semınar segiz kúnge sozylmaq.
Oqytýshylardyń biliktiligi men quzirettiligin shyńdaýǵa arnalǵan onlaın-semınar tyńdaýshylaryna 72 saǵattyq kýrstan ótkendigin aıǵaqtaıtyn sertıfıkat tabystalady.