Aqtóbe oblysynyń tilderdi damytý basqarmasynyń Tilderdi oqytý ortalyǵynyń tapsyrysymen ázirlengen latyn grafıkasyna oqytý sıpatyndaǵy telejobalar aımaq turǵyndarynyń nazaryna usynylýda.
Qazaq tilin latyn grafıkasyna kóshirý jumystaryn júrgizý baǵytynda Aqtóbe oblysynyń tilderdi damytý basqarmasynyń Tilderdi oqytý ortalyǵy bıylǵy jyly «Tórlet, tól álipbı!» atty uzaq merzimdi jobany qolǵa aldy. Atalǵan joba buǵan deıin júrgizilgen «Qosh keldiń, jańa álipbı!» aqparattyq-túsindirý saǵattarynyń jalǵasy. Kúni búginge deıin «Qazaq tili emlesiniń negizgi erejelerin» áleýmetke egjeı-tegjeıli túsindirý maqsatynda 25 000-ǵa jýyq adamdy qamtyǵan 400 is-shara (aqparattyq-túsindirý saǵaty, dáris, kezdesý, dóńgelek ústel) ótti. Onyń ishinde, «Kúlki terapıasy» taqyrybynda aýdıo dıktant, Aqtóbe qalasynyń 150 jyldyǵyna arnalǵan «Jasaı ber, kórkeıe ber, týǵan qalam!» ashyq dıktanty júrgizildi.
Oblys turǵyndarynyń jańa grafıkany meńgerýge degen qyzyǵýshylyqtary joǵary. Osy rette, latyn grafıkasyna oqytý sıpatyndaǵy ortalyqtyń birqatar telejobalary iske asyrylýda. Atap aıtsaq:
- «Jańa álipbı – jarqyn bolashaq» áleýmettik rolıgi ázirlenip, maýsym-shilde aıy boıy «Aqtóbe» telearnasy arqyly berilýde. Maqsaty: Qazaq tilin latyn grafıkasyna kóshirý qajettiligin negizdeıtin aspektilerdi túsindirý, oblys turǵyndaryn aqparattandyrý.
- «Tildaryn» balalarǵa arnalǵan telejobasy 1 maýsym halyqaralyq balalardy qoǵaý kúnine oraı kishkentaı búldirshinderge jol tartty. Maqsaty - mektep jasyna deıingi 3-6 jas aralyǵyndaǵy balalardyń úsh tilden bastapqy tildik bilimderin qalyptastyrý, dúnıetanymyn keńeıtý, úshtuǵyrly til saıasatyn nasıhattaý jáne latyn grafıkasyna negizdelgen qazaq álipbıin tanystyrý, úıretý. Baǵdarlama «Rıka TV» telearnasy arqyly árbir senbi kúni saǵat 15:30-da jáne qaıtalaýy jeksenbi kúni 9:25-te efırden beriledi.
-«Jańa álipbıdi birge úıreneıik!» eresekterge arnalǵan telebaǵdarlamasy. Maqsaty: latyn negizdi qazaq tili álipbıiniń, «Qazaq tili emlesiniń negizgi erejelerin» praktıkalyq turǵyda meńgertý, kópshiliktiń oqý, jazý mashyqtaryn arttyrýǵa yqpal etý. Baǵdarlama «Rıka TV» telearnasy arqyly árbir senbi kúni saǵat 18:45-te jáne qaıtalaýy jeksenbi kúni 9:00-de efırden beriledi.
Sonymen qatar, ortalyqtyń «til-aktobe.kz» resmı saıtynda qazaq tiliniń jańa grafıkasyn úıretýge arnalǵan «Tiltaný» qashyqtyqtan oqytý sabaqtary jarıalandy. Sabaqtar sıklin qurastyrýshylar qazaq tili oqytýshylary, latyn grafıkasyn meńgertý boıynsha sertıfıkattalǵan trenerler D.Nurmuhamedova jáne G.Tólegenova.
Ortalyq qyrkúıek aıynda latyn grafıkasyna negizdelgen qazaq álipbıin úıretý maqsatynda qysqa merzimdi oqytý kýrstaryn bastaǵaly otyr. Túrli sala qyzmetkerlerin jáne oblystyń eresek turǵyndaryn qamtıtyn bul oqytý kýrstaryn Aqtóbe qalasy jáne 6 aýdanda (Alǵa, Muǵaljar, Qobda, Qarǵaly, Hromtaý, Mártók) latyn grafıkasy boıynsha sertıfıkattalǵan trenerler, ıaǵnı ortalyqtyń qazaq tili oqytýshylary júrgizetin bolady.