Aqparattyq qaýipsizdik, kıbershabýylǵa qarsy áreket qazirgi qoǵamda kez kelgen salada, tipti jeke tulǵa úshin de óte mańyzdy. Al memlekettik turǵydan syrtqy jáne ishki kıbershabýylardan saqtaný jáne onyń aldyn alý sharalary únemi jetildirýdi qajet etedi.
Aqparattyq qaýipsizdik jáne jeke derekterdi qorǵaý salasyndaǵy ahýaldy jaqsartý úshin kadr daıyndaýǵa erekshe kóńil bólý mindetti. Osy maqsatta Astana IT ýnıversıteti oqý ordasynyń 5 jyldyǵyna oraı «FR13NDS AITU CTF 2024: Aqparattyq qaýipsizdik jáne etıkalyq hakerler» baıqaýyn ótkizdi.
El azamattarynyń barshasyna qatysýǵa múmkindik berilgen baıqaýdyń irikteý kezeńi 2024 jyldyń sáýir aıynda ótti. Oǵan QBTÝ, QazUÝ jáne HATÝ sekildi birqatar irgeli joǵary oqý oryndarynyń komandalary men «KazTransGlobal» JShS, ICV Central Asia, Freedom Holding, «GTS» AQ, «Halyq banki» AQ, t.b. jetekshi kompanıa ókilderiniń quramalary qatysty. Alǵashqy aınalymda 126 komanda 36 tapsyrma boıynsha baq synap, 10 top fınaldyq oıynǵa joldama alǵan bolatyn.
17 mamyr kúni irikteýden ótken úzdik 10 qurama arasynda sheshýshi oıyn ótti.
Sharany Astana İT ýnıversıtetiniń Akademıalyq jáne tárbıe jumysy jónindegi prorektory Bolatjan Qumalaqov ashyp, qatysýshy komandalarǵa sáttilik tiledi.
– Aqparattyq qaýipsizdiktiń mańyzyna jeke adamnan bastap, memlekettik deńgeıde de asa jaýapkershilikpen, saqtyqpen qaraıdy. Aqparattyq qoǵamda dál qazir jáne budan keıin de joǵary suranysta bolatyn salanyń qyr-syryn bilgen Sizder — naǵyz mamansyzdar. Bul — Sizderdiń kásibılikterińizdi shyńdaıtyn saıys. İzdenisterińiz, talpynystaryńyz toqtamasyn. Barshańyzǵa sáttilik, dostyq jeńsin! —dedi ol.
Fınalda «scimus_verum», «fsociety», «mimicats», «kbtu_ctf_enjoyers», «c1cada», «THREAT», «KTG», «r1p3rs», «ISV Central Asia», «sudo cat» quramalary «FR13NDS TEAM» jáne Astana IT ýnıversıteti ázirlegen tapsyrmalardy jyldamdyqqa oryndap, biliktilikterin baıqady.
Nátıjesinde jeńimpaz «scimus_verum» komandasyna 350 000 teńge, İİ jáne İİİ oryn ıegerleri «fsociety» men «mimicats» quramalaryna sáıkesinshe 250-150 myń teńgeniń sertıfıkaty tabystalady.
Shara barysynda stýdentter men qonaqtarǵa «Memlekettik tehnıkalyq qyzmet» AQ Aqparattyq qaýipsizdiktiń ulttyq úılestirý ortalyǵynyń bas sarapshysy Ábilqaıyr Imanberdıev, «Spectre Security Group» JSHS-nyń atqarýshy dırektory Medet Tursyn men SOC «QazSoc» kompanıasynyń jetekshisi Vıtalı Nazerenko aqparattyq qaýipsizdik, málimetterdi saqtaý men kıbershabýyldyń aldyn alý jáne shabýyl jasalǵan sáttegi áreket týrasynda tájirıbelerimen bólisti.